Machenike 呢個牌子係專出電競相關嘅產品，由電競筆電、枱機、芒，到鍵盤、滑鼠、手掣都有，最近佢哋宣佈將會推出一款備有雙芒嘅機械鍵盤 KT84，仲要有一個芒係玩 8-bit 嘅𠻹，究竟一個機械鍵盤點解會有雙芒？又有咩玩法呢？即刻睇睇。
KT84 採用 68 鍵佈局，支援 USB-C 有線、Bluetooth 及 2.4G 無線連接，而 2.4G USB 收發器可藏於鍵盤內，方便帶走使用，就咁聽落都係一個普通嘅 RGB 電競鍵盤啫，咁有乜特別先？
其實 Machenike 之前已經推出過一款型號 KT68 Pro 嘅機械鍵盤，都係玩 8-bit 芒嘅，而即將推出嘅 KT84 就加多一個細芒用嚟顯示資訊用嘅，佢最特別係鍵盤正面頂部有兩個屏幕，大嗰一個係顯示特效嘅 8-bit 屏幕 Smart Pixel Screen，用戶可透過 Animation Center 自定個人化嘅動畫效果，自己整咗嘅動畫效果又可以同其他人分享。
KT84 就響 Smart Pixel Screen 旁邊加入一個細細哋嘅多功能副屏幕，成為鍵盤上第二個芒，呢個副屏可以顯示一般資訊如鍵盤設定、日期時間、響鬧提示、電量連線等等；副屏旁邊有個可自訂功能嘅推桿，除咗可自訂快捷功能外，又可以一按返回桌面，另鍵盤左側有個獨立嘅旋鈕，以旋轉方式調校音量，好有 feel 呢。
講返 KT84 嘅按鍵先，KT84 用上透明鍵帽及鍵軸，雖然官方無提今次用咩鍵軸，但照上一次 KT68 Pro 係用 Gateron G Pro 2.0，估計 KT84 都係一樣，官方影片可見 RGB 動態燈光效果佳，同時又有良好嘅觸按感。不過 KT84 現時仲未正式推出市場，官方暫定響 6 月 20 號響 Kickstarter 作眾籌，有興趣可瀏覽以下網址。
